Job 16

Jopgo Elifasgo po wei ponobo po wali

(Dąį 16-17)

Jop agai suali, Godigo aga dolobo suali goli, agai Godibolo aga tau sao po wali

1 Jopgo po wei ponoyu, e tama wali,

2 “Hauwa sogo me eno deli te po naga odali.
Tama ma odobo ena hagela mu dao.
Dagego ena tau me sabeo. Mu meni.
3 Dagego enabolo e tama wali,
‘Jop, nago po olo wę asobo tiwai tebao.
Tama mena sogo pedauwali pania saibawe?
Nago mena homu elaluyu, nage dwai bidiyu,
dago po odaibawe? Meniwe te obao.
Nago po wei ponoyu naga ebo.’
Dagego te po wabo dao.
4 Tiali goli, dagebolo walaibao.
Ma, dage ena yaligia dwai bidigi sogo da,
teda eno dagego te ebo kolesaga tiwai dage dali
megi igi dao.
Eno po hauwa wabo da,
te eno hobede dagebolo ola mobao.
Tama eno tobolu gagamunobogo
dagebolo ola mayu, e tama tiwai igi dao,
te dwai nai dageba pedalibaso, noma siyu tigi dao.
5 Eno pedauwalidu po hauwa olama, dage bomo ilama,
dagego dene silimainu igi dao.
Tama eno tigi sogo da, te tobage kolesaga dabego
dage mena tama tau saibawe?
6 Tiali goli, enaduba ena kone palobo da. E tama tibo.
Eno po wabode, o ena po pedauwali
pania selama elaluyu da, tagala, tego ena tau
selama, eno dene silibo meni,” wali.

7 “Mu tama, God. Nago eno bomo tigidali mu silalio.
Nago ena dili hania ilama, eno tigi nomona salio.
Tama tibaso, eno abagi dedego
ena sulama, augwali wi ebao.
Tama augwaligo homugo eno dwai sę yalio olama,
tama nago ena te dwai sę wei ponobao.
Augwaligo te homu ebo. ^{▼▼16:7-8Bidi mebago homugo dago te vesde wali po begelama e tama po waina homu yali, “Mu tamao, God, nago eno bomo tigidali silali. Tama nago eno wai dabe dolama isalio. Nago eno tigi te mu nomona sabo sę ilama, te eno tigi bomo kimi mu meni yai. Tama te bidi dabego ena subo sogo da, augwaligo homugo eno dwai sę yaliwe homu yali, tama nago te dwai sę yali wei ponobo homu eyu, te nago enaba dene mabo sę genuai mu ebao.”}
9 Godigo ena suyu, godolo isąma,
ena agai boi bidi mu gagabao.
Agai ena dali sębę genuai mu elama, eno tigi me dolobo,
te bulu yowigo bulu hasa aga kelego
pepedebo tiwai ebao,” wali.
10 “Bidi dabego ena bobegela sali, enade dwai sę yainu.
Augwaligo ena gisugu mayu, eno naboge eleyu ebo.
11 Godigo ena aga tudiba mubo bagego
nogoba munama,
haniani dwai kolesaga ebo bagego nogoba muani.
12 Polobadu da, ena bugagia bidai dao.
Tiali goli, God aselama, tama eno dogoni
tola selama, dodolama, mu elali.
Tama ena mu dwali.
Agai ena te enego enebo nai me deli ilama,
13 tama agai ami bidi dabego ena enego enebo.
Tama agai eno haliga togali,
tama eno haliga buluba teda solama,
tǫba tigidali mu tulaluali.
Godigo ena hobede dwasianu me ebeo. Mu menio.
14 Agai ena obo elama, ena dali hwįbo da,
te bomai ami bidigo boi bidi dabego
hanu sainu ebo tiwai te ebao.
15 Polobadu da, ena genuai nogi elaluai dao.
Tiali goli, megi da, ena nai meniama, dolama mu bidiba.
Tama ena hale mu ebao.
Tama au dodobage sela sąnama,
hobede ebo ugwa gudama bidibao.
16 Ena gela genina ma wabo digi, eno gedu bǫ delama,
tama eno gedu pę mu yali.
Tama eno gesabidi dwai mu elalubo.
17 Eno dwai sę me isąbadi, tiali goli te sęgę dabe eno
tigi olo dali mu pedalali.
Eno gasa bidi dabe dali dwai sę me ebeo.
Tama me ma, eno gedu haluasa po me,
ena bilali me, God aga gedude
mu elalubadi goli da.”
Jopgo te po wali.

18 “Tǫ, odao. Ena isibo sogo te eno kaneme
tulalubo si da,
nago te kaneme haluamo. Menio.
Nago te kaneme pepeli dilide elalumainu sula tagalao.
Tama agai God i olama, te sęgę dodolomai yaibao.
19 Tiali goli, eno koneani, bidi me bidibo,
ena pagede bidabo bidi dagalude bidibo.
Agai koneani, eno magi dwai sę me ebe.
Tama agai eno po tau selama, bomo ilaibao.
Tama tiyu, eno po tų ebode ugwaba ela holaibao.
20 Te eno abagi dedego ena godolo isąmaiyu,
ena dolobo.
Tiali goli, eno Godibolo gela geninama wabo dao.
21 Tama eno homugo te ena bidabo bidi
agai ena tau somainu yaiba,
te God dali po dodolobode,
te bidigo aga abagi po dodolobo tau sabo yali
gilama.
22 Magi baso meni.
Ena bidibo sogo bodolu pęwadage mu elalubaso,
eno homugo kibu be deli o si elalubao.
Tama ena isibo sunumidu pelama, tama ena ma
asogobeo,” wali.